المنصه الاولي للاستشارات القانونيه في مصر في كافة التخصصات القانونيه

سرية حسابات البنوك والكشف عنها

سرية حسابات البنوك والكشف عنها

0 671

سرية حسابات البنوك والكشف عنها

الموضوع ده مهم لأنه بيرتبط بشغل كتير وقضايا كتير سواء كانت مدنية أو شرعية أو جنائية
طيب مبدئيا كده حق سرية حسابات العميل لدى البنك حق قانوني نص عليه القانون يعني محدش يقدر يعرف حساب العميل ولا اي حاجة خاصة بالحساب ده (قروض – سحب – ايداع – …..) والكلام ده طبعا معمول علشان البنوك تكتسب ثقة العملاء والناس عموما علشان يدخروا فلوسهم في البنوك.
والبنك مايقدرش يخالف الكلام ده ويقول لحد (شخص أو جهة) معلومات عن حساب اي عميل عنده إلا بموجب مسوغ قانوني (وهقولك كمان شوية يعني ايه مسوغ قانوني) وكمان لازم المسوغ القانوني يكون ليه مبررات للكشف عن الحساب طيب انا هلملك اللية دي (متقلقش) , جاي اهو :
علشان يتم الكشف عن اي حساب بنكي لازم توافر حاجة من اتنين , هما ايه دول بقى ؟؟!! هقولك :
الحالة الأولى : لو النيابة العامة بتحقق في جنحة أو جناية واتضح للنيابة من التحقيق ان في (دلائل قوية) وخللى بالك من عبارة (دلائل قوية) لأنها هي الحاكم في الحالة دي , المهم انه اتضح للنيابة من الدلائل القوية دي ان الكشف عن حساب المتهم ده هيفيد في مصلحة التحقيق.
وفي الحالة دي اللي بيطلع قرار الكشف عن حساب المتهم اللي في البنك هو النائب العام نفسه أو المحامي العام (على الأقل) , وده طبعاً بعد تقديم طلب لمحكمة استئناف القاهرة (يعني الطلب بيتقدم من النائب العام أو المحامي العام بنفسه).
الحالة التانية : لو في دائن للشخص صاحب الحساب والدائن ده ليه مصلحة انه يطلع على حساب مدينه ومصلحة الدائن هنا اللي احنا بنسميها قانونا (توقيع حجز ما للمدين لدى الغير) وطبعا الغير اللي هو البنك , يعني الكلام ده ؟؟؟!!
هقولك يعني الدائن هيحجز على الأموال اللي في حساب المدين تحت يد البنك لحساب الدائن وده طبعا علشان يحصل لازم الأول يتم الكشف عن سرية حساب المدين اللي في البنك علشان يتم الحجز.
وطبعا هفكرك ان الدائن علشان يعمل الكلام اللي فات ده لازم يكون معاه دين ثابت على المدين (مطلوب منك تراجع شروط حجز ما للمدين لدي الغير).
طيب احنا دلوقتي عايزين نعرف بقى قرار الكشف عن سرية الحساب ده بيطلع ازاي .. عايزين تعرفوا ؟؟!!
هقولك : هو ملوش غير جهة واحدة , بس مقدم الطلب بيختلف , يعني ايه ؟؟؟!
أولاً كده الجهة الوحيد اللي بتصدر القرار دي هي محكمة استئناف القاهرة , بتصدر قرار أو إذن قضائي أو أمر إلى البنك للكشف عن سرية حساب شخص معين , طب الاختلاف في ايه :
الاختلاف بيكون في الشخص اللي بيقدم الطلب , بمعنى ايه ؟؟؟!!
( أ ) يعني في الحالة الأولى (تحقيقات النيابة) اللي بيقدم الطلب إلى محكمة الاستئناف هو النائب العام أو المحامي العام مباشرة, ومضمون الطلب بيبقى صدور قرار للكشف عن سرية حسابات الشخص الفلاني.
(ب) وفي الحالة التانية (الدائن) الدائن هو اللي بيقدم الطلب (بس هنا) بيقدمه للنائب العام أو المحامي العام علشان بعد كده النائب العام أو المحامي العام يقدم الطلب لمحكمة استئناف القاهرة , وخلى بالك من حاجة انه حتى لو الدائن ده موجود في اي مكان لازم الطلب يتقدم في محكمة استئناف القاهرة.
حتة مهمة : فلنفترض ان بعد ما قدمت الطلب (كدائن) الى النائب العام أو المحامي العام علشان يقدمه لمحكمة استئناف القاهرة ومقدموش , هقولك ولا تقدر تعمل حاجة لأن النائب العام أو المحامي العام في الحالة دي ليه سلطة تقديرية في رفض الطلب وعدم تقديمه إلى محكمة استئناف القاهرة أو قبوله وتقديمه , وفي كل الحالات قرار النائب العام أو المحامي العام في الحالة دي لا يجوز الطعن عليه.
كفاية كده انهاردة (في الموضوع ده)
ولو في حد من الزملاء عنده اي إضافة يا ريت اكون أول المستفيدي
Leave a comment