ازاي ترجع تليفونك المسروق

ازاي ترجع تليفونك المسروق – نسيت التليفون في مكان واتقفل ،

اتسرق منك من غير ما تاخد بالك وبرضه اتقفل ،

طلع عليك عيل سرسجي ثبتك بسلاح وعايز ياخده منك …. اوعي تعمل فيها بطل وتمسك فيه اديله التليفون لان حياتك أهم الف مره منه سيبهوله وانا هقولك ترجعه ازاي أن شاء الله

مبدئيا اول ماتكتشف ضياع التليفون ارجع علي البيت علي طول وطلع العلبة بتاعته وياريت لو فاتورة الشراء كمان موجوده تبقي كده

وتطلع علي قسم الشرطه تعمل محضر بسرقة التليفون ..

وفي المحضر ده هيتم إثبات السيريال نمبر اللي هو الرقم المسلسل بتاع التليفون طب ايه فايدته السيريال ده ؟؟ فايدته أنه هو اللي هتقدر تعمل بيه بعد كده تتبع للتليفون وياريت متستعجلش هقولك علي كل حاجه في وقتها ،

بعد المحضر مايتعمل هتاخد رقمه وتطلع علي النيابه تسأل عليه وهناك هتقدم طلب استعلام من شركات المحمول اسمه طلب تتبع والطلب ده عشان يتعمل لازم يكون معاك السيريال نمبر والطلب ده أهميته أن لما التليفون بيتسرق اول حاجه بيعملها السارق أنه بيشيل الشريحه بتاعتك ويرميها وده علي اساس انه بيدفن القتيل يعني .. المهم لما بيتركب فيه شريحه تانيه بيظهر في شركة المحمول أن التليفون ده اتحط فيه الخط رقم كذا وبياناته كذا

بعد كده شركة المحمول بترسل خطاب رسمي للنيابة العامه بتحدد فيه اسم صاحب الخط الجديد اللي اتحط في التليفون وبتكتب كامل بياناته بعد كده النيابه بتطلع أمر ضبط وإحضار للسارق وتحدد له جلسه ويصدر فيها حكم ضده وعلي فكره حكم السرقه بيوصل حبس سنتين مع الشغل وكمان مفيهاش تصالح

بعد كده بتقدم طلب للنيابه عشان تستلم تليفونك وكده يبقي مبروك عليك رجوع التليفون وخلي بالك منه بعد كده