كيفية كتابة عقد سواء بيع أو ايجار أو مشاركه أو اتفاق

١ – العقد مش حيكون باطل لو مافيش شهود ماضين عليه المهم توقيع الشخص الى حيبعلك مش الشهود

٢ – العقد لازم يتكتب فيه تاريخ ماينفعش يكون فاضى وحضرتك تقولى نبقى نكتب التاريخ براحتنا

٣ – مافيش حاجه اسمها خالص الثمن حضرتك بتكتب فى العقد أن تمن الشيء المبيع كذا وتم سداد كامل الثمن بمجلس العقد ماينفعش تقولى اكتب خالص الثمن حضرتك مش بتشترى من كارفور ده عقد وله بنود وشروط

٤ – ياريت حضرتك لو مش حنتقل عليك سواء بائع أو مشترى تمضى على كل ورقه ياريت ماتستسهلش وتكسل

٥ – قولنا مليون مره فى فرق بين صحه التوقيع والتسجيل ومش كل العقود ينفع تتسجل فى الشهر العقارى ومش معنى أن العقد عليه ختم صحه توقيع يبقى اتسجل.

٦ – مافيش حاجه اسمها تنازل على ظهر العقد ويبقى كده اشتريت … اشتريت يعنى اعمل عقد بيع وشراء

٧ – ياريت لما حضرتك تشترى شقه أو تأجر تاخد آخر إيصالات مياه وكهرباء وغاز علشان لو المشترى باعلك مش حتشوف وشه تانى وغصب عنك حتدفعهم

٨ – صحه التوقيع مهمه وبتثبت تاريخ البيع وتوقيع البائع والمشترى ماتعملش ناصح وتقول مالهاش لازمه علشان ماترجعش تعيط بعد كده وعلى فكره ينفع المشترى يرفع صحه توقيع على البائع وكمان ينفع البائع يرفع صحه توقيع على المشترى مافيهاش حاجه كل واحد يضمن حقه

٩ – لو حضرتك اشتريت شقه تمليك ومالكش حصه فى الارض والبيت وقع كده حضرتك مالكش اى حاجه يعنى حضرتك اشتريت حيطان بس

١٠ – لو اشتريت شقه من واحد والشخص ده اتوفى بعد مابعلك من حقك ترفع صحه توقيع على ورثته عادى

١١ – عقد الإيجار ممكن يتعمل عليه صحه توقيع لو مدة الإيجار اكتر من ٩ سنوات ولو أقل من كده يبقى إثبات تاريخ

١٢ – ياريت قبل ماتشترى شقه تسأل هل صدرلها قرار تمكين ولا لا علشان لو زوجة البائع كانت عامله قرار تمكين للشقه قبل مايبعها يبقى عليه العوض ومنه العوض

١٣ – ياريت لما تشترى شقه ويكون عليها أقساط تعمل العقد من ٣ نسخ البائع ياخد نسخه والمشترى ياخد نسختين علشان لما حضرتك ترفع صحه توقيع للعقد المحكمه لازم يكون قدامها أصل العقد وطبعا المحامى مش حيقدر يسحب الأصل غير لما القضيه تخلص …

١٤ – على فكره عادى جدا انك ترفع دعوى صحه توقيع على عقد ابتدائى أو عقد لسه عليه أقساط